సాహో బడ్జెట్ ఎంతో బయటపెట్టిన ప్రభాస్.. నిజంగా దిమ్మతిరిగిపోతుంది

ఇండియాస్ బిగ్గెస్ట్ యాక్షన్ మూవీగా చెప్పుకుంటోన్న ‘సాహో’ చిత్రం ఈనెల 30న ప్రపంచ వ్యాప్తంగా భారీ ఎత్తున విడుదలవుతోంది. ‘బాహుబలి’ తరవాత ప్రభాస్ నటించిన సినిమా కావడంతో ‘సాహో’పై విపరీతమైన అంచనాలు ఉన్నాయి. ఈ అంచనాలను మరింత పెంచేందుకు ప్రచార కార్యక్రమాల జోరును పెంచింది చిత్ర యూనిట్. ఆదివారం తొలి మీడియా సమావేశాన్ని హైదరాబాద్‌లో నిర్వహించారు. ఇక బాలీవుడ్‌లో ప్రచారం కోసం ప్రభాస్, శ్రద్ధా కపూర్ నేషనల్ మీడియా ఇంటర్వ్యూలలో పాల్గొంటున్నా

ఇదిలా ఉంటే, ‘సాహో’ సినిమా బడ్జెట్‌పై తొలి నుంచి రకరకాలుగా ప్రచారం జరిగింది. రూ.250 నుంచి రూ.300 కోట్ల బడ్జెట్‌తో ‘సాహో’ను తెరకెక్కించారని, కేవలం దుబాయ్‌లో చిత్రీకరించిన యాక్షన్ ఎపిసోడ్‌కే రూ.80 కోట్లు ఖర్చుపెట్టారని వార్తలు వచ్చాయి. ఈ వార్తలకే సినీ ప్రేక్షకులు వామ్మో అన్నారు. అంత ఎక్కువ బడ్జెట్టా? అని ఆశ్చర్యపోయారు. కానీ, తాజాగా చిత్ర బడ్జెట్ గురించి ప్రభాస్ చెప్పిన సమాధానం వింటే నోళ్లెళ్లబెట్టాల్సిందే! ఎందుకంటే, ఈ సినిమాకు అక్షరాలా రూ.350 కోట్లు ఖర్చుపెట్టారట.ప్రముఖ సినీ ప్రచారకురాలు అనుపమా చోప్రాకు ఇచ్చిన ఇంటర్వ్యూలో ప్రభాస్ బడ్జెట్ గురించి మాట్లాడారు. ‘‘నిజం.. ఈ సినిమాకు రూ.350 కోట్ల బడ్జెట్ అయ్యింది’’ అని ప్రభాస్ వెల్లడించారు. ‘సాహో’ భవిష్యత్తుకు సంబంధించిన సినిమా అంటూ వస్తోన్న రూమర్లపై కూడా ప్రభాస్ స్పందించారు.‘‘ఇది ప్రస్తుతం జరుగుతున్నట్టుగానే ఉంటుంది. కొన్ని సన్నివేశాలు ప్రస్తుత కాలానికి దూరంగా ఉంటాయి. కానీ, నమ్మే విధంగా ఉంటాయి. ట్రైలర్‌లో నేను గాలిలో ఎగరడం మీరు చూసే ఉంటారు. దాన్ని మేం గొప్పగా చూపించే ప్రయత్నం చేశాం. ట్రైలర్‌లో మీరు చూసిన పింక్ లేక్ ఆస్ట్రేలియాలో ఉంది. సినిమాలో కనిపించే ప్రతిదీ రియలే. ప్రపంచంలోని అన్ని గొప్ప అంశాలను మేళవించి ఒక దగ్గరికి తీసుకొచ్చి అద్భుతమైన ఔట్‌పుట్ ఇచ్చే ప్రయత్నం చేస్తున్నాం’’ అని ప్రభాస్ చెప్పుకొచ్చారు.

కాగా, ‘సాహో’ చిత్రానికి సుజీత్ దర్శకత్వం వహించారు. యూవీ క్రియేషన్స్ బ్యానర్‌పై వంశీ, ప్రమోద్ నిర్మించారు. తెలుగుతో పాటు తమిళం, మలయాళం, హిందీ భాషల్లో ఒకేసారి ఈ చిత్రం విడుదలవుతోంది. వాస్తవానికి ఈ సినిమాను ఆగస్టు 15న విడుదల చేస్తున్నట్లు మొదట ప్రకటించారు. కానీ, పోస్ట్ ప్రొడక్షన్ పనుల్లో జాప్యం కారణంగా విడుదల తేదీని మార్చారు. ఆగస్టు 30న విడుదల తేదీని ఖరారు చేశారు.